Jon 2 | sml_BL_2008 | STEP | Ma deyom b'ttong daing pa'in si Yunus, angamu'-ngamu' iya ni si Yawe ya Tuhanna.

Jonah 2

Angamu'-ngamu' si Yunus

1 Ma deyom b'ttong daing pa'in si Yunus, angamu'-ngamu' iya ni si Yawe ya Tuhanna. 2 Yukna, “Pagka aku ma deyom kasigpitan
bay lingananku PANGHŪ'
ati kasambungan aku e'na.
Pagka aku ma lahat kamatayan,
bay aku angamu' tabang, ati takalenu pangamu'ku.
3 Bay aku larukannu pehē' ni s'llang
ni lalom tegob-tegoban, ni buliluk s'llog.
Bay aku tabowa e' abalnu,
Bay aku kasampoyakan e' goyaknu.
4 Ya pangannalku, ‘In aku palawaknu min matahannu.’
Magniyat aku mbal na maka'nda' pabalik
ma langgalnu sussi.
5 Agon-agon aku alembo ma tahik,
Alimun aku ma tahik tegob-tegoban,
Kaleboran aku e' sagmot tahik.
6 Pat'nde aku sampay ni deyo' katapusan.
Pa'abut aku ni lahat kamatayan,
ni lahat atambol lawangna salama-lama.
Daipara ka'a Tuhan, ka'a Panghū'ku,
bay angalappasan aku min deyo' katobtoban.
7 Song pa'in ab'kkat napasku,
taentomku ka'a, O PANGHŪ'.
Bay sabbutku ōnnu,
bay pasampayku panganduwa'aku ni ka'a,
ni deyom langgalnu sussi.
8 Sai-sai ameya'an tuhan-tuhan halam pūsna
alungay pangandolna ma ka'a.
9 Sagō' aku itu anukbalan kulban ni ka'a
hinabu angalang pamudji.
Tumanku bay najalku ni ka'a,
sabab ka'a ya si Yawe ya PANGHŪ' maglalappas.”

10 Puwas e', in daing aheya tasoho' e' PANGHŪ' angutta'an si Yunus pehē' ni bihing tampe.